Is noas de Fairphone 6

Mentris fia preparendi s'artìculu in contu de su Fairphone po su nùmeru 3 de sa revista de Ite Mi Contas est bessida sa versioni noa de su telefoneddu èticu. S'artìculu est arrannèsciu bene, calincunu mi-dd'at fintzas bantau e mi fait prexeri mannu, ma si fait riferimentu a is piessìnnius de sa versioni 5, duncas andaus a biri ita est cambiau in sa 6.

Schermu

A primu, su schermu si fait pagu pagu prus piticu (6,31" cun una risolutzioni de 1116x2484 contras is 6,46" con 1224x2700 de su bèciu) ma aumentat sa frecuèntzia de annoamentu de 90Hz a 120Hz e su tipu de pannellu passat de OLED a LTPO OLED, frunendi una mellus calidadi de màgini cun un'impreu prus efitzienti de sa bateria.

Unidadis de elaboratzioni

Su mòlliu nou passat de unu processori Qualcomm QCM6490 a unu Snapdragon 7s Gen 3, prus rexenti, prus lestu e cun una mellus efitzèntzia.
Sa GPU (chip de elaboratzioni gràfica) passat de s'Adreno 643 a s'Adreno 810 amellorendi sa rèndida de giogus e àteras aplicatzionis multimedialis.

Memòria

Sa memòria interna abarrat a is 256GB de sa mellus versioni de su 5, cun sa possibilidadi de ponni una microSD finas a 2TB.
Sa RAM est de 8GB

Bateria

Si passat de una de 4200 mAh a una de 4415 mAh, promitendi una durada finas agiumai a 54 oras.

Arretzas

Fairphone suportat is arretzas 5G cun duas SIM, una fìsica e una eletrònica (eSIM). In prus, teneus su WiFi, BlueTooth, NFC, GPS e àteru.

Sistema e aplicatziones

Su telefoneddu si bendit cun Android 15 o, a sceberu, cun /e/OS, s'Android deGooglizadu e rispetosu de sa riservadesa chi s'apu giai contau. De seguru, tra pagu ant a essi a disponimentu fintzas LineageOS, Ubuntu Touch e forsis àterus sistemas puru. Su telefoneddu NO portat totu cussas aplicatzionis inùtilis chi faint su sistema pesosu e chi, po calincuna arraxoni, no fait a ndi tirai (bloatware - software chi unfrat), unu puntu chi minescit de essi arremonau.

Fairphone Moments

Custa est una noa de interessu: su Fairphone 6 tenit unu tastu chi permitit de passai a una modalidadi minimali, po si pausai e po no tenni sa distratzioni de notìficas e aplicatzionis vàrias. Est de utilidadi candu si boleus cuntzentrai asuba de àteras fainas ma no boleus studai su telèfonu de su totu. Pro ndi sciri de prus, ligi custu artìculu.

A parti is cumponentis eletrònicus e is programas, no si depeus scaresci calis funt is prus cosas de importu de Fairphone: su fatu de favoressi unu cummèrtziu giustu innui is matèrias primas no benint de su sfrutamentu de pipius o òminis trataus che sciaus e su fatu chi totu is cumponentis de su telefoneddu si potzant cambiai in s'in casu s'arroghint: in su situ s'agatat dònnia parti, de manera chi si, po nai, si guastat sa fotocàmera, no tocat a nci fulliai totu su telèfonu.

In s¡arretza s'agatant giai unas cantu retzensionis de su Fairphone 6 chi bantant su disìnniu (infinis funt arrannèscius a no si fai nai chi su telefoneddu parit giai bèciu, comenti narànt de is versionis de innantis!), s'ètica de su progetu, sa modularidadi de is cumponentis, su schermu e sa memòria, ma crìticant is prestatzionis e sa fotocàmera, chi no arribant a is de àterus mòllius de prètziu parìbili.

Fairphone duncas est stètiu annoau ancora una borta e mancai no ddoi siant càmbius de importu mannu, s'acostat a su pròpiu livellu de is àterus telefoneddus mèdius chi agatamus me is butegas. Abarrat su mellus sceberu si boleus unu telefoneddu chi potzat durai annus e annus ca fait a dd'arrangiai si una parti si guastat e si boleus unu dispositivu arrespetosu de is deretus umanus e unu pagu prus atentu fintzas a sa riservadesa nosta.

Po ndi sciri de prus, s'imbiu a su giassu ofitziali.

Sa màgini de cobertedda est de Fairphone - https://www.flickr.com/photos/fairphone/54611701742/, CC BY-SA 4.0, Ligòngiu