Facebook preparat s'IA sua, impreendi is datus tuus

A pagu a pagu, is impitadoris de Facebook funt arricendi unu messàgiu po ddis comunicai chi Meta at a impreai is datus insoru po addestrai is funtzionalidadis noas de intelligèntzia artifitziali. Bideus in curtzu ita bolit nai e ita podeus fai si sa cosa no si fait prexeri.

De intelligèntzia artifitziali eus fueddau meda me is mesis passaus. Si tratat de algoritmus chi sìmulant su processu de decisioni de unu cerbeddu umanu impreendi càrculus statìsticus. In s'ùrtimu annu, custu tipu de programa at ofertu arresurtaus spantosus, bessendi bastanti bonu de simulai unu linguàgiu naturali in un'arraxonu, creendi màginis e vìdeus e àtera cosa meda. Un'algoritmu de IA de sòlitu po podi funtzionai comenti si tocat, ddi fait bisòngiu a passai po una fasi de addestramentu, innui ddis frunint datus realis chi permitint de afinai is arresurtaus.

In custu perìodu s'interessu in contu de is servìtzius chi impreant s'IA est mannu e duncas is prus asiendas de importu circant de ndi tenni unu po no lassai calai su balori insoru in su mercau finantziàriu. Su matessi est acuntèssiu me is annus de su boom de is diàrius in lìnia (blog) e apustis de is arretzas sotzialis, candu fintzas Google at creau s'arretza Google+, progetu serrau unus cantu annus a poi. Meta est trighendi a svilupai un'IA sua ma est preparendi-sì a incumentzai s'addestramentu impreendi su patrimòniu de datus de is iscritus a sa prataforma. Calincunu de nosu difatis at giai arriciu una notìfica che custa:

e faendi clic asuba, ndi bessit custu messàgiu:

Impitadoris chi no funt cuntentus de custu impreu de is datus insoru duncas podint profetai de su deretu de opositzioni faendi clic in su ligòngiu chi biint in su messàgiu

e in sa pàgina chi bessit fait a argumentai s'impreu de is datus nostus. A sa fini de totu Facebook at a imbiai una notìfica de cunfirma, che custa:

Impitadoris chi no ant (ancora) arriciu sa notìfica e no bolint abarrai abetendi-dda, podint sighi puru custu ligòngiu e sceberai de no lassai impreai is datus po addestrai s'IA.

Est pretzisu a arregordai chi custu no at a blocai totu s'impreu de is datus nostus chi fait Facebook, giai chi sa prataforma est "a indonu" in càmbiu de su manìgiu de is datus cun sa punna pruschetotu de personalizai sa publicidadi chi bieus in s'interis de sa navigatzioni.