Skype serrat!

Forsis is prus giòvunus no dd'iant mancu mai intèndia, ma Skype, app chi permitit de scambiai messàgius e tzerriadas (tipu Whatsapp, Telegram, etc), est stètia de importu mannu po genti meda me is annus 2000 e sa prima parte de is 2010. Est stètia difatis una de is primas, e sa prus arrannèscia in giru de is annus 2010, chi permitiant de telefonai a traessu de Internet impreendi unu PC e, apustis, unu telefoneddu. Microsoft at comunicau chi dd'at a serrai ocannu, 2025, in maju.

In s'incumentzu Skype fiat simpri meda: si podiat tzerriai a un'àteru impitadori de Skype a in donu opuru, paghendi, una lìnia telefònica. Fintzas de aici, pariat unu spantu, ca is video-tzerriadas cun sa lìnia telefònica clàssica fiant caras meda e àteras aplicatzionis permitiant sa videochat, ma si tratàt sceti de una tzarra de testu cun possibilidadi de si biri in vìdeu, cosa chi forsis oi fait a arriri a ddu pensai. Fadiat a imbiai messàgius de testu, ma sceti si s'àteru impitadori teniat s'aplicatzioni aberta. Cosa de importu, fiat un'app multiprataforma, est a nai chi funtzionàt in prus sistemas operativus, duncas fintzas is impitadoris de Linux dda podiant impreai. Cun su tempus s'est fata prus sofisticada, assimbillendi a totu is àteras app de messageria istantànea chi connosceus. Microsoft si-dd'est comporada in su 2011 e in su 2013 at serrau Live Messenger, àtera app chi eus stimau meda innantis de Facebook e Whatsapp, po si cuncentrai asuba de Skype sceti. Comentisisiat, po s'impreu professionali, Microsoft at giai cambiau Skype For Business cun Teams una pariga de annus a oi e po cantu pertocat is àterus impitadoris, est craru chi preferint a impreai Telegram, Whatsapp e àteras. Mancu s'integratzioni de Copilot, s'intelligèntzia artifitziali de Microsoft, nd'at amellorau sa sorti.

Is chi ancora impreant Skype tenint tempus finas a su 5 de maju de su 2025, ca apustis no at a funtzionai prus.