Mozilla traballat a sa VPN cosa sua

Mozilla est traballende a una retze VPN chi pro su momentu est in fase beta e a disponimentu isceti in pagas regiones de su mundu. Sa promissa de Mozilla est de pònnere a disponimentu una VPN fàtzile de impreare e fata segundu is opiniones de is impreadores e de is netzessidades issoro.

Una VPN (Virtual Private Network, Retze privada virtuale) est una retze de elaboradores acapiados pari pari chi traballant comente chi esserent in su pròpiu ufìtziu mancari siant a tesu meda, fintzas in logos diferentes de su mundu gràtzias a unos cantos protocollos de comunicatzione. In prus, sa connessione est de sòlitu codificada, a manera chi s'iscàmbiu de datos siat seguru. In is ùrtimos annos is VPN sunt impreadas pro agiùnghere seguresa e riservadesa a is connessiones a Internet. Ddoe at medas servìtzios, siat in donu, siat a pagamentu. Su servìtziu de Mozilla costat 4,99$ pro mese.