Una bella Die de sa Sardigna!

Unu saludu bellu a totus.
Oi est sa festa de su pòpulu sardu e apo detzìdidu de regollere su cumbidu de sa Fondazione Sardinia a iscrìere duos faeddos pro dda festare.

Sa Sardigna est bivende unu momentu difìtzile e tristu, cun s'isulamentu, su pensamentu pro su benidore e un'amministratzione chi no est fadende unu bonu traballu in su manìgiu de s'emergèntzia. Fintzas cun custos pensamentos, is sardos ant ammustradu coràgiu e generosidade, donende totu s'agiudu possìbile, fintzas cun donatziones de dinari a is ispidales chi ant passadu in totale su millione de èuros e cun su fàbbricu de màscaras chirùrgicas pro is operadores sanitàrios.

Puru sa cuarantena podet però tènnere calicuna cositedda de positivu. Pro esempru, gente meda tenet prus tempus pro lèghere e istudiare de prus. E insandus, pro ite no pigare custa ocasione pro imparare pagu pagu de prus in contu de s'istòria de Sardigna, incumentzende dae su sentidu de custa die? De materiale nche nd'at meda, fintzas in sardu, dae sa pàgina de Wikipedia a àteros giassos web, libros, etz. Podides partire dae is notas de sa pròpiu pàgina pro bìdere unu pagu de bibliografia.
Est ispantosu canto nos podet imparare s'istòria de is antepassados nostros e nos diamus dèpere pregontare pro ite s'iscola nde chistionat pagu e nudda a is pitzocos.

Sardumàtica at chircadu de bos dare materiale pro passare su tempus e bos informare subra s'informàtica in sa limba nostra e at a sighire fintzas a pustis, pro ite ca semus fieros de sa cultura nostra e no atzetamus de tènnere una limba pro sa sièntzia e una pro sa brulla.

Passade una bella Die de sa Sardigna, nos bidemus luego.