Samsung firmat s'annoamentu a Android 10 pro S'A70

A pustis de unos cantos problemas cun is telefoneddos A70, Samsung at dèpidu firmare s'annoamentu de su sistema operativu Android a sa versione 10. Una parte de is usuàrios at tentu problemas mannos, cun telefoneddos chi signalaiant sa bateria comente iscàrriga e non s'allumaiant prus. A cantu paret sa parte manna de is problemas sunt istados signalados dae is Paisos Bàscios.

Su problema paret dèpidu a su tzircùitu integradu chi controllat sa càrriga de sa bateria. S'annoamentu cambiaiat su firmware de custu tzircùitu etotu, ma sa versione noa non fiat cumpatìbile cun parte de is protzessores montados dae custu mollu de telefoneddu. Samsung at a dèpere istudiare una solutzione pro custu problema a in antis de torrare a pònnere a disponimentu custa versione noa.