Immàgines PNG impreadas pro furare datos

Is chircadores de Avast, su produtore de unu de is prus antivirus famados de su mundu, ant publicadu un'articulu de interessu a pitzus de una tècnica impreada pro furare datos a aziendas de importu e de guvernu in Àsia. Sa cosa de interessu est chi su còdighe pro nde-ddos furare est cuadu in immàgines PNG che milliones de àteras chi s'agatant in Ìnternet.

Is possibilidades de cuare informatziones (bonas o malas) in immàgines o àteros archìvios sunt diferentes. Amus giai atopadu un'ameletzu chi si depiat a una debilesa de buffer overflow e est in teoria possìbile a progetare immàgines pro isfrutare una debilesa che custa.

Custa borta sa tècnica impreada est diferente: si càrrigat in su computadore de sa vìtima unu programma chi decodìficat un'archìviu PNG chi paret un'immàgine che àteras ma cuat unu programma chi furat datos de s'impitadore. Non s'ischit ancora bene comente su programma de s'incumentzu potzat èssere carrigadu in s'obietivu de s'atacu, ma si creet chi potzat èssere fatu isfrutende una debilesa de su sistema.

Si tratat duncas de un'atacu fine, difìtzile de iscoviare e pro custu perigulosu meda. Seguru, immoe chi est istètiu identificadu is programmas antivirus ant a resèssere a ddu blocare in antis chi fatzat àteru dannu. Sa noa bona est chi s'atacu est progetadu pro su sistema Windows e duncas non tocat a is impitadores de Linux e Mac.

Po nd'ischire de prus, leghe s'artìculu originale.