UE: is baterias depent èssere fàtziles a cambiare

Dae su 18 de freàrgiu de su 2027 is baterias de is dispositivos portàtiles depent èssere fàtziles de cambiare pro s'impitadore, sena dèpere impreare trastos professionales e malos a agatare. Ddu narat sa lege noa de s'Unione Europea chi punnat, in paris cun s'òbligu de disponibilidade de is partes de ricàmbiu pro 7 annos a incumentzare dae sa data de cummertzializatzione e de annoamentos de is programmas pro 5 annos, a ridùere s'isperdìtziu de dispositivos ancora bonos e duncas a isminorigare sa cantidade de àliga de dispositivos elètricos e eletrònicos.

Sa lege non s'at a aplicare a sa pròpiu manera pro totu is dispositivos e est de interessu a cunsiderare chi pro telefoneddos e tablet no amus a torrare a is baterias chi si nde bogaiant aberende un'isportellitu a palas de su dispositivu: custu diat a èssere complicadu ca custos trastos si sunt fatos fines fines boghende·nde logu a is partes mecànicas chi diant serbire, ma at a èssere comente si siat prus fàtzile a ddos abèrrere sena arriscare de ddos arrogare comente acontesset oe. Sa chistione est diferente pro is computer portàtiles, ca su logu est prus mannu e faghet a pònnere una bateria a incastru comente si faghiat finas a pagos annos a oe.

Sa noa in is retzas sotziales e sitos web italianos est istada retzida cun reatziones mistas: calicunu nd'est istadu cuntentu, medas àteros ant cummentadu cun ironia e àteros ancora non sunt nudda cuntentos chi is telefoneddos non depant tènnere s'atzessu a sa bateria comente fiat in antis, cun unu cobertore a incastru. Ma mancari non bidant totus su bantàgiu de custa polìtica, est bene a regordare chi nos chesciamus ònnia die de sa betzesa programmada de is dispositivos, chi custos non durant nudda e chi semus semper comporende trastos noos mentres in antis sa cosa duraiat annos e annos. Bene meda duncas chi si fatzat unu passu a in antis concas a una tecnologia chi non siat fata pro nche la fuliare sa die a pustis de dd'àere comporada - unu passu a in antis curtzu, ma mègius de nudda.