Sony abbandonat sa forma fìsica de is giogos

Custas dies s'est arresonende meda de sa detzisione de Sony de abbandonare de su totu is CD/DVD comente a forma de publicare is giogos pro sa PlayStation, passende de su totu a s'iscarrigamentu digitale.

Sa detzisione paret un'evolutzione naturale de sa manera de impreare is cuntènnidos, siant mùsica, tzìnema, giogos e aplicatziones. A pagu a pagu difatis is CD sunt isparèssidos dae sa vida diària de medas de nois, a su puntu chi giai dae ora meda is PC non tenent prus su leghidore integradu, chi immoe bolet comporadu a parte. Is produtores de consolas de giogu ant postu a disponimentu butegas digitales che is de is telefoneddos, e fintzas is giogadores de PC impreant Steam o àteras butegas imbetzes de andare a comporare is giogos in forma de discu.

Mancari totu custu, impitadores medas si sunt postos contras a custa noa. Su discu fìsicu difatis rapresentat meda de prus chi non su giogu de carrigare in su dispositivu. A primu, a medas de is giogadores praghet a fàghere colletzione de giogos. Segundu, si mancat sa forma fìsica, mancat fintzas sa possibilidade de torrare a bèndere su giogu. A is produtores de seguru cumbenit a ochiere su mercadu de sa segunda manu, de manera chi sa gente sigat a comporare cosa noa, e ddis cumbenit puru a eliminare is costos de imprenta e distributzione de is discos, ma custu cumbenit prus pagu a is giogadores chi non podent chircare is tìtulos in ebay o àtera prataformas. Ma su prus problema mannu de custa idea dd'amus giai bidu custas dies, cando Sony at bogadu tìtulos medas dae su catàlogu e persones chi ddos aiant giai comporados ddos ant pèrdidos: cun unu CD/DVD custu non diat a èssere possìbile, ca su suportu fìsicu abarrat in domo nostra e nemos ddu podet retirare.

Abarrat duncas sa duda, si semus movende unu passu a in antis o si custu càmbiu cumbenit isceti a is aziendas mannas, mentres nois s'agatamus semper prus pagu in manu. Pro chie totu ddi podet interessare, ddoe est una petitzione pro pedire a Sony chi càmbiet custa detzisione. Dd'agatades inoghe.