Firefox: comente ativare is grupos de ischedas

Sa possibilidade de agrupare is ischedas in unu navigadore esistit giai in Chromium e derivados (Google Chrome, Opera, Vivaldi, etc), mentres mancat ancora in Firefox. In manera ufitziale, a su mancu. Esistint difatis dae ora estensiones chi permitint de agiùnghere custa funtzione e un'annu a oe prus o mancu si faeddaiat giai de unu suportu nadiu, chi impitadores medas domandaiant. Custu suportu immoe esistit, ma est ancora un'esperimentu e duncas est cuadu comente a cunfiguratzione predefinida. Inoghe bos isprico comente si faghet a dd'ativare.

Pro incumentzare depides abèrrere Firefox pro cumputadores e pònnere s'indiritzu "about:config". In sa pàgina chi cumparet ddoe est una barra de chirca. Iscriide "browser.tabs.groups.enabled". Sa pàgina bos at a ammustrare una lìnia, cun balore false: cambiade custu a true e serrade sa pàgina.

A custu puntu bastat a fàghere clic cun su tastu de dereta in un'ischeda cale si siat  e seberade "Agiunghe ischeda a unu grupu nou". Ais a tènnere sa possibilidade de seberare unu colore e unu nòmine pro connòschere su grupu. At a èssere possìbile a agiùngere ischedas a su grupu chi esistit o a nde creare àteros; faghet a redùere su grupu faghende clic a subra a s'eticheta, aici is ischedas ant a èssere cuadas pro mantènnere sa ventana ordinada.

In paris cun sa possibilidade de creare "cuntenidores", custa funtzione noa permitit duncas de traballare in manera prus neta a chie totu acostumat a abèrrere deghinas de ischedas. Est giai a disponimentu in sardu gràtzias a su traballu de Sardware e at a èssere ativa in manera ufitziale in una de is versiones benidoras de Firefox, no ischimus cale, ma faghet giai a incumentzare a dda impreare comente amus bidu. Una cosa no est ancora crara: si custa funtzione at a esìstere puru in Firefox Mobile, sa versione pro telefoneddu e tablet. A dolu mannu sa pàgina about:config no dd'ant ancora torrada a custos dispositivos, duncas non faghet a averiguare.