Su domìniu .srd est arribau a su cunsillu de sa regioni

Eus giai chistionau de sa batalla po su domìniu .srd, unu trastu chi iat a agiudai sa Sardìnnia a strantaxai un'identidadi digitali sua, comenti spricau beni in custu artìculu in su situ de Filosofia de Logu.
Apustis de annus innui s'idea est stètia agiumai dessintotu inniorada, parit chi càncua cosa si movat me is ofìtzius de sa Regioni Autònoma de Sardìnnia.

Difatis, su 26 de ladàmini 2021, su Cunsillu Regionali at aprovau unu finantziamentu de unu progetu de circa cun sa punna de otenni su domìniu po sa minoria linguìstica "SRD".

A dolu mannu, s'idea no est stètia amparada de totu is cunsilleris e dispraxit ancora de prus su motivu de is Progressistas po votai contras a s'emendamentu, giai chi ant impreau sa sòlita fràsia benaltrista "ddoi at cosa prus de importu de fai". Comenti chi no ddoi fessit unu bisòngiu mannu de unu pranu nou po s'economia sarda, impari cun sa màgini chi megaus de amostai a su mundu. Arrexoni teniat Anthony Muroni, chi dd'iat prevìdiu.

No est sa primu borta chi si chistionat de domìniu .srd in su cunsillu: in su 2017 est intrau in sa Finantziària, ma a sa fini no est sucèdiu nudda. Tropu chitzi, duncas, po nai chi su progetu est portau a cumprimentu. Arracumandu a totu is chi no dd'ant fatu, de firmai sa petitzioni e dda cumpartziri comenti podint.