Publicau Haiku R1/beta3

De Haiku eus giai chistionau innoi e in su diàriu de Bideas puru. Est su sistema operativu in sivlupu cun sa punna de fruniri unu sistema cumpatìbili cun BeOS, lìberu, eficienti e fàcili de impreai e programai.
Tres diis a oi, su 25 de argiolas, est bessia sa de tres versionis beta. Beta, dd'aregordaus, bolit nai chi su sistema est cumpletu ma iat a podi tenni ancora calincuna faddina e duncas no est dessintotu prontu po s'impreu de dònnia dii.

Is noas de custa versioni funt:

• processu de installatzioni amellorau, cun sa possibilidadi de cambiai unu sistema giai installau e partzidura de is discus prus fàcili e afidàbili;
• prus stabilidadi e atòliu de su sistema de manìgiu de is pachetus;
• mellus esperièntzia de impreu gràtzias a sa curretzioni de faddinas vàrias de s'interfaci de impitadori;
• curretzionis e funtzionis noas de su serbidori gràficu, cun benefìtziu de is aplicatzionis chi ant disenniai asuba a su schermu;
• funtzionis noas po su navigadori web;
• sa libreria de arretza est bessida stàtica po permiti mudàntzias chena sciusciai is aplicatzionis chi esistint;
• curretzionis a is sistemas de is archìvius, po assegurai una memorizatzioni prus afidàbili;
• prus cumpatibilidadi siat cun su sistema BeOS, siat cun is sistemas POSIX (Linux e àterus sistemas Unix), po fai a manera de podi cumpliai su còdixi chi esistit giai po custus sistemas;
• cumpatibilidadi cun prus cumponentis eletrònicus. De importu mannu s'amelloramentu de is pilotas de is dispositivus USB3.

Haiku R1/beta 3 si podit scarrigai de su situ ofitziali. Agataus siat sa versioni a 64 bit siat sa a 32 bit, de interessu pruschetotu po is ordinadoris bècius. In contu de dispositivus dataus, mi parit làstima chi apant decìdiu de bogai is pilotas "wavelan", minimendi sa cumpatibilidadi cun is dispositivus WiFi a 11Mbps, ma su sceberu si cumprendit: su suportu de unu nùmeru prus artu de dispositivus bolit prus traballu e sa prioridadi est chi su sistema sigat a funtzionai cun is màchinas noas.

Eus a biri cun un'artìculu benidori comenti funtzionat su sistema in màchina virtuali e mancai puru in dispositivus realis.
Si totu is curretzionis e is noas de sa beta 3 arresolvint is problemas chi ia sinnalau po sa beta 2, su sistema est in caminu po sa versioni 1 ofitziali.