Est arribendi sa Beta 2 de Haiku
Su progetu de Haiku at publicau giai de calincuna cida unu resùmini de s'atividadi de abrili, chi donat una noa bella: si previdit sa publicatzioni de sa versioni Beta 2 a sa fini de maju, 1 annu e mesu a pustis de sa prima beta. Intra is mellorus chi custa versioni at a bitiri ddoi at una stabilidadi prus manna in su suportu de vàrius tipus de perifèricas e in is prestatzionis.
Po is chi no ddu scint, Haiku est unu sistema operativu lìberu svilupau de una comunidadi de boluntàrius cun sa punna de essi cumpatìbili cun BeOS, un'àteru sistema chi esistiat fintzas a is primus annus 2000 e po unu certu perìodu est stètiu candidau a pigai su logu de su Mac OS Clàssicu.
Haiku est disinnau po tenni unu nùcleu cun tempus curtzus de risposta e atòliu mannu. Su sistema est lèbiu meda, s'interfàtzia est mìnima e de impreu fàcili e duncas est bonu no sceti po elaboradoris bècius, ma fintzas po is chi bolint unu sistema chena cumplicatzionis chi non ndi liat tropu resursas po funtzionai.
Haiku est ancora in versioni beta. Bolit nai chi sa parti manna de su traballu de svilupu est fata e su sistema s'iat a podi fintzas impreai po traballai, ma càncua parti potit ancora tenni faddinas chi ndi podint arruinai su funtzionamentu e sa stabilidadi.
No bideus s'ora de proai custa versioni noa. Eus a torrai a chistionai de Haiku candu sa Beta 2 est pùblica, cun sa proa nosta de su sistema.
Cumenta