Torrant is telefoneddus cun baterias rimovìbilis?

Ndi chistionat Tom's Hardware chi pigat sa noa de una rivista olandesa.
Parit chi s'Unione Europea siat circhendi de amanniai sa vida de is telefoneddus inteligentis. Totus scieus chi unu de is problemas prus comunus cun is telefoneddus est sa bateria chi si scàrrigat sèmpiri prus impressi.

Sa bateria perou no si podit cambiai chena portai su dispositivu a unu centru specializau cun unu gastu chi a bortas est prus de su valori de su telefoneddu etotu, duncas sa parti manna de nosu còmporat unu telèfonu nou, unu sprecu de risorsas chi s'umanidadi non si podit prus permiti. Cun sa possibilidadi de bogai is baterias, s'impitadori ndi at a podi comporai una noa e dda montai chena connoscèntzias tènnicas, chena depi smontai su telefoneddu e arriscai de dd'arrogai.

Po imoi, nudda est cunfirmau ni de s'UE ni de is produtoris chi, incapas, no ant a essi cuntentus de depi torrai a cambiai su disinnu de is produtus insoru.