Arribat sa modalidadi de inserru po iOS e MacOs

Apple megat de agiungi una funtzioni noa po permiti una protetzioni in prus de su dispositivu: sa modalidadi de inserru (Lockdown Mode, in s'annùntziu originali). Custa modalidadi nascit po gherrai contra a atacus de programas malus che Pegasus, unu programa-spia svilupau de s'asienda israeliana NSO group e impreau po scocai e scoviai informatzionis de ativistas po is deretus umanus, giornalistas e personàgius polìticus. Su nòmini est unu riferimentu craru a sa cuarantena chi eus bìviu totus in s'interis de su primu annu de pandemia de COVID-19. Si custa siat una bella idea o un'esercìtziu de gustu malu, ddu lassu decidi a bosàterus.

Sa modalidadi de inserru lìmitat unas cantu funtzionis de su dispositivu chi podint essi impreadas po atacus informàticus:

• is archìvius agiuntus a unu messàgiu, a foras de is màginis, e sa presentada de is ligòngius funt blocaus;
• unas cantu tecnologias web, comenti sa cumpilatzioni giustu-a-tempus de JavaScript funt blocadas, si s'impitadori no ddas ativat a manu;
• tzerriadas FaceTime e messàgius arribendi de disconnotus funt blocaus;
• si bogant totu is albums cumpartzius e is invitus benidoris;
• is acàpius cun cavu de su telefoneddu a su computadori funt blocaus;
• no fait a installai profilus de cunfiguratzioni.

Totu custus blocus serbint a avitai s'installatzioni de programas chena ddu sciri s'impitadori.
Sa funtzioni at a essi a disponimentu in iOS 16 e in MacOs Ventura. At a pertocai duncas telefoneddus iPhone, tauleddas iPad e computadoris iMac e MacBook. Apple at specificau chi si tratat de una funtzioni de impreai candu si suspetat un'atacu sèriu e sofisticau, fatu raru chi no acuntessit a sa parti manna de is impitadoris.