WSL podit esecutai aplicatzionis cun interfaci gràfica
Po is chi no ddu connoscint, WSL (Windows Subsystem for Linux) est unu suta-sistema chi permitit de esecutai aplicatzionis po Linux in unu sistema Windows 10. Installendi-ddu est possìbili a impreai custus programas comenti chi fessint trastus po sa lìnia de cumandu chena depi impreai una màchina virtuali comenti VirtualBox o VMWare. A incumentzai de Windows 10 Build 21364 fintzas is programas cun interfaci gràfica ant a essi suportaus.
Is impitadoris pediant custa funtzionalidadi giai de su 2016, candu Microsoft at annuntziau sa creatzioni de WSL (càstia innoi).
Ma in s'annùntziu de s'annoamentu 21364.1000 (KB5003397) agataus puru sa noa de sa possibilidadi de impreai programas cun interfaci gràfica. Mancai si chistionit de presentada (preview), in su diàriu devblog de Microsoft scoberreus unus cantu piessìnnius de interessu ligaus a custu suta-sistema, comenti s'integratzioni cun s'àudio de su sistema e s'aceleratzioni 3D, de importu mannu po totu is aplicatzionis multimedialis e calincunu impreu professionali. In su pròpiu artìculu imparaus puru una pariga de minudas apitzus de su funtzionamentu de WSL: no tocat a fai nudda in prus po impreai aplicatzionis gràficas, poita ca WSL aviat a manera automàtica una distributzioni de Linux chi cuntenit Wayland, su serbidori X e àterus servìtzius chi serbint a custas aplicatzionis po funtzionai. Totu custus trastus funt serraus candu acabaus de ddus impreai.
Calincunu de nosu iat a podi sighi a preferri una màchina virtuali po impreai Windows e Linux a su pròpiu tempus, giai chi custu sighit a tenni unus cantu bantaxus: unu sistema stràngiu dessintotu separau de su sistema principali permitit de lassai dannus a unu o a s'àteru sistema isolaus e de ddus arrangiai o mudai a manera prus fàcili e indipendenti. Windows Subsistem for Linux est perou unu trastu de interessu po podi impreai programas po is duus sistemas in sa pròpiu scrivania: dda podeus pensai comenti a solutzioni a s'imbressi de Wine, mancai su funtzionamentu siat totu diferenti.
Cumenta