It'est Dirty Stream, unu perìgulu nou po is telefoneddus Android

Unas cantu diis a oi, Microsoft at sinnalau de ai scobertu una debilesa grai in aplicatzionis Android de importu chi iat a fai a impreai po impestai millionis de telefoneddus cun programas dannàrgius. A sa tènnica de atacu informàticu chi fait profetu de custa debilesa dd'ant postu "Dirty Stream", (flussu brutu, o trasmissioni bruta).

Custu problema pertocat su cumponenti de Android chi manìgiat sa cumpartzidura de archìvius intra aplicatzionis diferentis. Custu, impreau comenti si tocat, permitit cuncàmbius de datus in seguresa. Su problema nascit candu un'app cunfiat tropu cun is archìvius chi arricit chena nd'averiguai nòmini e cuntènniu: de aici, un'aplicatzioni mala podit fai a manera chi s'arricidori cantzellit archìvius bonus cambiendi-ddus cun àterus malus, sarvit còdixi malu e, a bortas, ddu mandit in esecutzioni.

Sa debilesa descrita, chi parit una faddina de novìssiu, dd'ant agatada finas in app famadas meda, comenti su manigiadori de archìvius de Xiaomi o WPS Office (arrangiadas apustis). Cunsillaus duncas a is impitadoris de donai atentzioni a is aplicatzionis chi scàrrigant, pruschetotu candu ddas installant a traessu de archìvius APK.

Po ndi sciri de prus, fait a ligi s'àrticulu de Microsoft.