WineWDM: programas po Windows 3.1 in Windows 11

In su nùmeru 4 de sa revista de Ite mi Contas apu fueddau, circhendi de essi prus craru possìbili, de su progetu Wine e de comenti custu permitit de impreai is programas po Windows in Linux e àterus sistemas tipu-Unix. Apu fintzas spricau comenti dd'installai e chi tra is programas chi fait a impreai ddoi funt is po Windows 3.0 e 3.1 (programas a 16 bit), chi is ùrtimas versionis de Windows no suportant prus.
Sa parti de Wine chi ddu permitit est impreada fintzas in un'àteru progetu: WineWDM.

Depeis sciri innantis de totu chi Windows est cambiau meda cun su tempus, adatendi-sì a su caminu de sa tecnologia, e is programas si funt adataus a custus càmbius, ponendi-ddus a profetu po oferri prus funtzionis e amellorai s'atòliu. Est comenti chi a pagu a pagu Windows e is programas apant imparau a fueddai un'àtera lìngua.

Windows circat de apoderai sa cumpatibilidadi cun programas prus bècius, ma cun s'arribu de is sistemas a 64 bit nd'at bogau sa possibilidadi de impreai programas a 16 bit, cunsideraus oramai tropu bècius po essi de utilidadi. Calincunu de nosu perou mancai si spàssiat ancora cun unu gioghixeddu de cuss'època o impreàt unu programa chi funtzionàt beni meda e no dd'at mai bòfiu cambiai in totu custus annus. Ddoi est sa possibilidadi de impreai DosBox o una màchina virtuali cun MS-DOS (o FreeDos) e Windows 3.1 installau. Est una solutzioni chi no costat nudda e funtzionat beni meda, ma si prefereis a tenni s'integratzioni màssima cun su sistema e nisciunu àteru programa de ponni intramesu, podeis proai WineWDM. Si scàrrigat de innoi e apustis de dd'ai installau is programas po Windows 3.1 ant a torrai a funtzionai comenti calisisiat àteru.

Comenti funtzionat WineWDM, asuta a su còfanu?
Sendi chi Windows a 64 bit no suportat prus una de is funtzionis chi Windows a 16 bit impreàt, WineWDM depit a primu emulai unu processori bèciu po fai funtzionai is istrutzionis a 16 bit. Segundu, impreat su còdixi de Wine chi tradusit is funtzionis de Windows a 16 bit in istrutzionis a 32 bit. A ùrtimu, ddoi funt àteras cunversionis. Po nai, me is ùrtimas versionis de Windows, is programas no podint scriri in sa cartella C:\WINDOWS. Si unu programa a 16 bit circat de ddu fai, WineWDM scriit s'archìviu in una cartella dedicada. De custa manera, su programa po Windows 3.x agatat s'ambienti giustu po funtzionai.