Antitrust USA contras a Google

Google est stètia acusada de su governu de is Stadus Unius e s'Antitrust de pràticas anti-concurrèntzia po tenni sa positzioni sua de monopòliu.

Segundu Il Sole 24 Ore, s'acusa est de ai pagau asiendas tennològicas po mantenni Google comenti motori de circa predefiniu. In custa manera, sa parti manna de is circas sighit a essi fata a traessu de cussu permitendi-ddi de gadangiai sèmpiri de prus.

S'acusa no spantat meda, ca Google est in dònnia logu calisisiat cosa faeus in Internet: Android est su sistema prus impreau me is telefoneddus e Chrome est su navigadori prus impreau me is elaboradoris, agiumai totus tenint un'indiritzu GMail e una parti manna meda de is situs impreat Google Analytics po analizai su tràficu. Sceberus is usuàrius ndi tenint, nd'eus biu calincunu po is motoris de circa e po Android puru, ma custu baliat fintzas po Microsoft, chi perou in is annus de Windows 7 dd'iant obligada a amostrai una schermada de sceberu po su navigadori.