Is istòrias de Telegram funt sparèssias e nemus sciit poita

Calincunu forsis si-nd'est acatau: in Telegram sa barra chi amostàt is istòrias no si biit prus. Fait ancora a biri is postadas bècias in su profilu ma no ddoi est prus sa possibilidadi de ndi creai noas. Custu acuntessit siat cun su telefoneddu siat in sa versioni Desktop.

Is istòrias funt unu piessìnniu de vàrias arretzas: permitint de amostai unu cuntènniu lestu, comenti una màgini e una descritzioni curtza chi a su sòlitu aparit pagus segundus po lassai su logu a sa chi benit, unu sìmbulu de la lestesa de s'Internet de oi, in ui sa cosa si fait po si-dda scaresci pagus segundus apustis.

Is istòrias de Telegram, comentisisiat donant sa manera de cumpartziri calincuna cosa cun totu is cuntatus chena depi creai grupus o imbiai messàgius privaus. Esistint de su 2023, in s'incumentzu sceti po is impitadoris de Telegram Premium (a pagamenta) e unu mesi apustis po totus.

A incumentzai de una pariga de diis a imoi, sa barra de is istòrias no cumparit prus in s'interfaci, cosa chi s'ant cunfirmau impitadoris vàrius, ma in Internet no s'agatat nudda in contu de custa strolichèntzia: Telegram no at annuntziau de nci-ddas ai tiradas de su programa (in beridadi, no ddoi est mancu su registru de is càmbius po sa versioni 5.13.1 chi seus impreendi imoi) e funt ancora arremonadas in sa lista de funtzionis. In custu momentu duncas no si cumprendit ita est acuntèssiu, si siat unu problema de is serbidoris o unu sceberu de sa sotziedadi chi distribuit Telegram.
Una cosa perou si podit nai: parit chi is istòrias no amanchint a nemus, sendi chi no ddoi funt chèscias in nisciunu logu!

ANNOAMENTU DE IS 21:15:

Apustis de unas cantu oras, unu voluntàriu de su suportu de Telegram m'at fatu sciri chi sa funtzioni est torrada a pagamenta e duncas est a disponimentu sceti po is impitadoris de Telegram Premium. Stranu meda chi apant decìdiu de ddu fai a sa muda, chena nai nudda a nemus, ma aici est...