Microsoft si preparat a publicai Windows 11?

S'est chistionendi meda me is ùrtimus diis de s'annùntziu de una versioni noa de Windows chi Microsoft iat a depi fai su 24 de làmpadas. No si sciit meda e segundu unus cantu narìngius no ddoi at essi una versioni noa, ma un'annoamentu mannu de Windows 10, chi dd'ant a nai Windows 10 Sun Valley, sighendi su stili de Mac OS X po is nòminis de sistema e pighendi elementus de un'àtera versioni cancellada de Windows, sa 10X. Comentisisiat, The Verge at publicau un'artìculu chi amostat unas cantu màginis de Windows 11 chi parint cunfirmendi chi Microsoft siat acanta de dd'annuntziai.

Funt giai passaus ses annus de sa publicatzioni de Windows 10, unu de is mellus sistemas de Microsoft fintzas a imoi impari cun Windows XP chi fiat durau unus 5 annus innantis de s'arribu de Windows Vista, unu de is peus bessius. Fintzas is duas versionis innantis de sa 10, sa 8 e sa 8.1, no funt praxas meda a su pùblicu e pariant fatas cun sa pressi de bessiri cun unu sistema chi podessit funtzionai me is telefoneddus e tauleddas, ponendi-si in cumpetitzioni cun Android e iOS. Windows 10 fiat su cumpletamentu de custu tretu concas a un'ecosistema chi depiat ponni impari dispositivus mòbilis e computadoris clàssicus: s'acabu de un'època e s'incumentzu de una noa.

Cun su fallimentu de Windows Phone/Mobile, Microsoft at amarolla dèpiu cambiai is pranus suus, torrendi a si cuncentrai asuba de is computadoris e sa lìnia sua de tauleddas, Surface. Su pagu chi scieus in contu de Windows 11, si Microsoft no nos'at arreservau calincunu spantu po s'annùntziu, sighit custa lìnia, parrendi prus un'annoamentu de Windows 10 chi no unu sistema dessintotu nou. Custas difatis funt is prus noas de importu, segundu su chi si narat in su web:

• unu menù de aviu (Start) simplificau, chena is Live Tiles de Windows 10. Is iconas de su menù e de is aplicatzionis no funt prus alliniadas a manu manca in sa barra de is processus, ma postas in su centru. Po cantu ndi scieus, at a essi possìbili a torrai agoa a sa bisura chi su menù e is iconas tenint oi;
• una versioni noa de is Widgets, cussus programeddus chi si podiant agiungi a sa scrivania de Windows 7 e chi funt apustis stètius abandonaus;
• amelloramentus de s'interfaci, cun sa possibilidadi de movi e ordinai is ventanas abertas cun s'impreu de controllus nous;
• una butega (Store) noa po donai possibilidadis noas a is svilupadoris de bendi is aplicatzionis insoru aìnturu de su sistema;
• aplicatzioni po s'Xbox integrada in su sistema cun amelloramentus de s'esperièntzia de impreu;
• mellus manìgiu de is arresursas e pruschetotu de su processori gràficu (GPU).

Abarraus abetendi s'annùntziu de Microsoft po ndi sciri de prus e mancai de podi proai Windows 11 in una versioni beta comenti est acontèssiu cun sa 8 e sa 10.

Sa màgini de s'artìculu est pigada de su situ Tieba Baidu.