Comenti funtzionat su sistema IT-Alert? Fait a ddu studai?

Sa dii 30 de làmpadas de ocannu eus arriciu totus unu messàgiu de allarmi de proa de unu sistema chi ddi narant "IT-Alert". Calincunu si-nd'est atzicau, calincunu infadau, àterus dd'ant serrau chena pensamentus, ma est de interessu a castiai comenti funtzionat custu sistema, chi parit bastanti invasivu?

Sa primu cosa chi eus biu est chi po funtzionai no boliat nisciuna app noa e si potzu giai ponni in assèliu: nisciuna app est stètia installada chena si domandai su permissu.

Sa tecnologia impreada po custu sistema difatis no est noa, ma nascit cun su sistema GSM (sa segunda generatzioni de telefonia mòbili, o 2G) e sighit a essi a disponimentu in totu is sistemas de telefonia chi megaus de impreai fintzas oindii. Ddi narant Short Message Service-Cell Broadcast (SMS-CB, Servìtziu de messàgius curtzus a spainadura de cella).
Is messàgius funt fatus cunforma a unu formau chi ddi narant Common Alerting Protocol (CAP, Protocollu comunu de avisu), unu standard chi permitit a prus tipus de dispositivu de ligi is pròpius allarmis.

Comenti forsis scieis giai, su sistema de comunicatzioni mòbili est fruniu a traessu de unas cantu antennas chi formant prus cellas chi amantant su territòriu, creendi su "campu" de sinnali. Su telefoneddu s'acàpiat a sa cella chi coberit su puntu innui s'agatat. In sa làcana intra prus cellas, sceberat sa chi dd'imbiat su sinnali prus forti in manera automàtica: s'impitadori no s'acatat de nudda, mancai siat fueddendi.

SMS-CB permitit de imbiai messàgius de emergèntzia o de utilidadi pùblica a totu is telefoneddus acapiaus a una o prus cellas, calisisiat s'operadori insoru. Su sistema tenit su bantaxu de podit essi impreau po arribai a personas medas in unu tempus limitau e de no bolli datus in prus de is impitadoris, ca abastat chi tèngiant unu telefoneddu allutu. Su sistema duncas no est prus invasivu de sa riservadesa de cantu no siat sa simpri propiedadi de unu telefoneddu.

No scieus ancora po ita at a essi impreau custu sistema IT-Alert, cunsiderau chi su servìtziu ddu manìgiat sa Protetzioni Civili. S'orròliu de calincunu est chi nd'abusint dònnia borta chi ddoi at un'alerta mèteu, giai chi in Sardìnnia nci-nd'at medas po debadas in s'interis de s'annu. E duncas calincunu pregontat si fait a inniorai custus avisus. S'arrespusta est eja e est puru fàcili.

In Android bastat a andai in "Impostazioni" > "Suoni e Vibrazione" > "Altre impostazioni" > "Cell broadcast". Inguni podeus sceberai cali tipus de notìficas boleus biri e si su telefoneddu depit sonai e/o vibrai, comenti bieis in sa màgini. Su cunsillu miu, comentisisiat, est de no studai custas notìficas e de biri comenti at a funtzionai su servìtziu, giai chi at a podi essi impreau po avisus de importu.