S'acuntèssida de su colletivu Autistici/Inventati

Fàcili chi innantis de oi pagus nd'apant intèndiu chistionai, ma su colletivu de hacker Autistici/Inventati (A/I) est nàsciu in su 2001 po difendi sa libertadi de fueddu, sa privatesa e gherrai contras sa tzensura in lìnia, frunendi servìtzius comenti posta eletrònica, spàtziu web e àterus servìtzios a ativistas, movimentus e colletivus chi ndi cumpartzant is baloris. Issus etotu si definint anti-fascistas, anti-militaristas, anti-sessistas, contràrius a sa globalizatzioni e a is speculatzionis finantziàrias.
Pagus diis a imoi, su guvernu USA at decìdiu de classificai A/I comenti a grupu terrorista, blochendi·ndi sa faina in lìnia, lassendi·ddu chena contu bancàriu e lassendi fintzas chena servìtziu chini totu teniat su situ web in s'arretza insoru. Si tratat de una medida grai meda chi, in prus de fai dannu a unu grupu chi no tenit nudda de fai cun su terrorismu, depit fai pensai a comenti est fàcili a s'agatai a foras de s'arretza, chi oi serbit po totu, e chena dinai, po nexi de una decisioni de is Stadus Aunius.

Su grupu difatis tenit totu sa strutura sua in Itàlia e impreat is servìtzius de sa Banca Etica (chi at giai espressau solidariedadi), ma fintzas de aici, po un'atu de tzensura de su guvernu stadunidensu s'est agatau de una dii a s'àtera de su totu blocau, sceti pro una chistioni ideològica.
Su guvernu italianu est lassendi fai, comenti podiaus imaginai in unu stadu serbu de s'Amèrica che s'Itàlia, duncas est fàcii puru a crei chi custa cosa at a torrai a acuntessi e s'at a furriai a arma de ameletzu po dònnia òrganu e grupu chi is USA no ant a agradessi, siant de manca o de dereta. Lassendi·ddus fai ddis donaus su permissu, a incumentzai de imoi, de aplicai una tzensura a totu is cuntènnius de sa retza. Est su momentu duncas de cundennai custu episòdiu e de pediri a boxi manna chi Internet siat unu logu lìberu.

E forsis si depeus domandai fintzas si digitalizai totu est un'idea bona. Sa dii chi totu at a essi in Internet, eus a lassai su cuntrollu de su dinai nostru, de is canalis de informatzioni, tv, ràdiu, giornalis e fanzine, librus e totu su restu a s'Amèrica?

Mentris nchi pensais, si lassu unu ligòngiu a sa lìtera aberta de su grupu.