Is noas de Android 11

Sa versioni noa de Android est bessida a prus de un'annu de sa de dexi e is dispositivus cumpatìbilis dda funt giai scarrighendi po s'annoai. Ia giai chistionau de unas cantu noas de custu sistema in un'artìculu de su martzu passau. Andaus a biri imoi una pariga de càmbius de importu po s'esperièntzia de impreu.

1. Arregistratzioni de su schermu
   Totus scieus chi est possìbili a caturai un'istantànea de su schermu (screenshot), ma chi boleus fai unu vìdeu depeus installai un'app chi du permitat. Incumentzendi de sa versioni 11 custu si podit fai chena depi impreai àteras aplicatzionis.
2. Arraxonadas
   Is arraxonadas (chat) de is aplicatzionis funt agrupadas in sa parti arta de s'àrea de is abisus. Su programa circat de imparai cali funt is arraxonus prus de importu po nosu e ddus amostat innantis de is àteras. Ddoi at puru is "bullucas" de s'arrexonada comenti in su Messenger de Facebook.
3. Menù nou po studai
   Su menù po studai su dispositivu amostat puru is sceberus po su controllu de sa domòtica.
4. Autorizatzionis temporàneas
   Candu un'aplicatzioni pedit s'autorizatzioni a una funtzioni de su sistema, est possìbili a dda giai una borta sceti. Is autorizatzionis funt bogadas apustis chi no funt impreadas po tempus meda.
5. Facixeddas noas
   S'arregorta de facixeddas (Emoji) bessit prus arrica. Ancora, a dolu mannu, no nc'at sa bandera sarda!