S'app Immuni est unu fallimentu

Funt sceti 4 millionis is scarrigamentus de s'app Immuni, su programa po telefoneddus chi depiat agiudai a firmai sa spraxidura de s'impestu de COVID-19. Est unu nùmeru meda prus bàsciu de su 60% de sa populatzioni chi fiat sa percentuali de segudai po podi funtzionai beni. Su scarrigamentu no est obligatòriu e in nisciunu casu ddu podit essi po mori de sa costitutzioni italiana e de is leis in contu de privadesa, ma su guvernu italianu sperat de cunvinci prus genti cun una publicidadi prus manna me is diis chi benint.

Is motivatzionis de custu nùmeru bàsciu funt pruschetotu is chèscias e is pensamentus apitzus de is perìculus po sa riservadesa de datus de importu che su stadu de saludi e is moviduras de is usuàrius. Ddoi at pagu fidi in custa operatzioni e in s'impresa chi at scritu gratis s'app po su guvernu e chi tenit unu de is fillus de Berlusconi comenti sòtziu.
A custu, s'agiungint problemas tènnicus, poita genti meda tenit dispositivus tropu bècius po custa app e ddoi at regionis chi portant s'aplicatzioni insoru, chi no tenint ligàmini cun Immuni.