Libero, Virgilio e Microsoft Teams "asuta". Ita acuntessit?
A incumentzai de is 7:00 de su 23 de gennaxu is impitadoris de Libero e Virgilio no podint impreai is casellas de posta eletrònica insoru. In su momentu chi seu scriendi cust'artìculu est su merì de su 25 e ancora no funtzionant. Est sa bàscia de servìtziu prus longa de sèmpiri po is duas prataformas. In prus, a incumentzai de is 7:00 de oi, fintzas Microsoft Teams at tentu sinnalatzionis meda de funtzionamentu malu. Andaus a castiai ita megat de acuntessi.
Libero fiat su portali de Infostrada, unu frunidori de servìtzius Internet famau meda de sa metadi de is annus 90 a sa metadi de is 2010. Virgilio frunit servìtzius medas e fiat famau meda me is primus annus 2000 po su motori de circa suu (cambiau apustis cun Bing, su de Microsoft).
Mancai oindii is servìtzius no siant prus famaus che una borta, ambus tenint casellas de posta medas ancora ativas. In totu, si chistionat de noi millionis de casellas chi no funt funtzionendi.
Sa primu cosa chi is impitadoris ant pensau, biendi chi su servìtziu no est a disponimentu po unu tempus longu de aici, est stètiu un'atacu informàticu a sa prataforma. Calincunu forsis s'est arregordau chi Liberu dd'iant giai atacau, furendi-ddi is crais de is impitadoris. ItaliaOnline, propietària de is duas prataformas, at negau s'ipòtesi de s'atacu, ponendi unu comunicau me is pàginas de sa webmail. In sa comunicatzioni sa sotziedadi si scusat po is problemas e contat chi custus si depint a un'annoamentu de s'infrastrutura de arretza chi no est andau beni, prometendi de arresolvi totu in 24/48 oras.
Po cantu pertocat Teams, su problema fiat fintzas de àterus prodotus cloud de Microsoft 365 comenti Outlook Online e OneDrive for Business. Bolit nai chi su problema est pruschetotu de is impitadoris professionalis. Asiendas medas impreant Teams comenti programa de messageria intra collegas e po is atòbius de traballu. Microsoft no at ghetau comunicatzionis po spricai is arraxonis de s'acuntessimentu, ma at decrarau chi su problema fiat arresoltu a is 15:30 de oi. S'est tratau duncas de unu disservìtziu meda prus limitau de su de ItaliaOnline.
Cumenta