Amazon denùntziat su tràficu de arrecensiduras
Amazon at presentau una denùntzia contras unu sistema de arrecensiduras positivas a insertzionis in càmbiu de dinai o prodotus gratis.
Su sistema fiat coordinau a traessu de unus cantu grupus in Telegram po mèdiu de personas chi faiant sa funtzioni de intermediàrius. A is usuàrius de su grupu ddus invitànt a lassai arrecensiduras positivas in càmbiu de dinai o de prodotus cun scontu. Prodotus cun votus positivus tenint prus possibilidadis de essi cunsillaus a àterus usuàrius e duncas de essi bèndius. Po is bendidoris si tratàt duncas de un'investimentu: paghendi càncua arrecensidura podiant bendi de prus.
Su problema de cust'andeu est chi is comporadoris cunfiànt cun prodotus po mori de opinionis farsas. Custu iat a podi essi fintzas una spricadura po totu cussas bortas chi prodotus cun cincu steddus arribant a domu e no cumprint nudda cun is promissas. In pràtica, sa trampa fait dannu a is usuàrius chi, a sa fini, perdint totu sa cunfiàntzia cun sa prataforma. Po custu, Amazon at decìdiu de denuntziai su cumportamentu, chi at a podi costai dinai meda a is autoris, po multas e rifata de dannus.
Cumenta