Publicau FreeDOS 1.3

Una pariga de diis a oi eus chistionau de sa publicatzioni de una versioni noa de ReactOS, cloni de Microsoft Windows. Parrit duncas ironia chi apant publicau puru una versioni noa de FreeDOS, sistema operativu chi megat de clonai MS-DOS, àteru prodotu Microsoft chi impreaiaus innantis de sa publicatzioni de Windows 95.
Sa versioni noa est sa 1.3 e nd'eus chistionau un'annu e mesu a oi, creendi chi fessint acanta de ddu publicai.

No ddoi at una lista cun totu is càmbius de sa versioni noa cumparada cun sa 1.2, duncas si depeus amarolla acuntentai de su chi narat s'annùntziu:

• sa versioni de FreeCOM, s'interfaci de impitadori, lompit a sa 0.85a;
• su nùcleu lompit a sa versioni 2043;
• suportu de FAT32 po sa versioni po protzessoris 8086. In custa manera ant a funtzionai finsas discus fissus prus mannus;
• sa versioni in discus floppy impreat sa cumpressioni, duncas nd'ant a serbiri prus pagus;
• suportu po s'arretza;
• programas e giogus nous.

Su sistema fait a ddu scarrigai de su situ ofitziali e podit essi impreau in computadoris cumpatìbilis cun PC (protzessoris de s'architetura x86 e x86-64, sa parti manna de is chi impreaus in domu) o in màchinas virtualis.

Sa màgini de s'artìculu est propiedadi de su FreeDOS Project.