Pranificau s'adiosu a su 3G

Sa telefonia mòbili est a sa de cincu generatzionis. Mancai medas de nosu tèngiant ancora aparatus de una pariga de annus a oi e duncas no siant ancora impreendi is tecnologias noas, de custu 5G nd'eus intèndiu chistionai giai tropu po is cumplotismus chi ddoi funt a giru, e fintzas po totu su manìgiu chi bolit su strantaxu de is arretzas noas, comenti s'òbligu de cambiai is aparatus televisivus po liberai unas cantu frecuèntzias de dedicai a sa telefonia. S'annu chi benit, un'àtera cosa de importu at a acuntessi: ant a studai su 3G.

Dd'at annuntziau TIM e Vodafone dd'iat giai pranificau po ocannu, cun sa promissa chi is resursas impreadas oi po su 3G ant a serbiri po amellorai is arretzas 4G e 5G.

Ita càmbiat po is impitadoris? Nudda, po is chi tenint unu telefoneddu o una tauledda pigaus me is ùrtimus annus, ca de seguru funt giai impreendi assumancu su 4G. Is chi tenint aparatus prus bècius ant a impreai una connessioni 2G (GPRS, EDGE), prus lenta, chi at a sighi a funtzionai. Craru est chi si sa lestesa de sa connessioni est de importu, pruschetotu chi s'impreat Internet po is tzarradas àudiu/vìdeu, at a bolli nai ca est tempus de cambiai is aparatus cun mollus prus rexentis.
Apu biu me in su web calincunu pensamentu po aparatus de guardiania e àterus dispositivus cumandaus de tesu chi bolint una scheda SIM e chi càncua borta funtzionant sceti cun protocollus 3G (UMTS, HSPA). Po custus no fait a essi segurus e at a tocai a cuntatai is domus produtoras e pregontai.

No est sa primu borta chi naraus adiosu a una tecnologia chi no serbit prus in su mundu de is telefoneddus: su 31 de su mesi de idas 2005 est acabau su servìtziu 1G (protocollu TACS), ma bolit nau chi custu càmbiu at pertocau pagu genti, ca sa difusioni manna de is telefoneddus est incumentzada me is ùrtimus annus 90, candu ddoi fiat giai su protocollu GSM, de segunda generatzioni.