S'Unioni Europea bolit su sistema operativu suu?
Sa ministra de sa finàntzia finlandesa, Katri Kulmuni, at propostu a s'Unioni Europea de svilupai unu sistema operativu e unu navigadori web suu. Sa motivatzioni ofitziali est a fai su continenti europeu mancu dèbili e arredusi sa dipendèntzia de pagus cumpangias.
S'idea no est noa. E difatis, sa Rùssia at svilupau cun su pròpiu motivu unu sistema operativu, Astra Linux, e sa Cina tenit Kylin e COS.
Sa ministra at decrarau:
S'influèntzia nimiga po mèdiu de su manìgiu de is retzas informàticas e de is datus est s'arriscu (de seguridadi) prus mannu chi depeus afrontai in s'imbenidori. Is cuncurrentis stadunidensus e cinesus funt ananti a nosu.
Sa Finlàndia est su paisu de sa Nokia, sotziedadi de importu mannu in sa produtzioni de dispositivus mòbilis e aparatus de retza. Si podit duncas cumprendie sa timoria de is atzionis de sa cuncurrèntzia e de atrus paisus. No tocat a scaresci sa briga intra s'aministratzioni de is Stadus Unius de Amèrica e su produsidori Cinesu Huawei.
Cumenta