UE: is baterias depint essi fàcilis a cambiai

De su 18 de friaxu de su 2027 is baterias de is dispositivus portàtilis depint essi fàcilis de cambiai pro s'impitadori, chena depi impreai trastus professionalis e malus a agatai. Ddu narat sa lei noa de s'Unioni Europea chi punnat, impari cun s'òbligu de disponibilidadi de is partis de ricàmbiu po 7 annus incumintzendi de sa data de cumertzializatzioni e de annoamentus de is programmas po 5 annos, a redusi su sperdìtziu de dispositivus ancora bonus e duncas a minorigai sa cantidadi de àliga de dispositivus elètricus e eletrònicus.

Sa lei non s'at a aplicai a sa pròpiu manera po totu is dispositivus e est de interessu a cunsiderare chi po telefoneddus e tablet no eus torrai a is baterias chi si-ndi bogànt aberendi unu sportellitu a palas de su dispositivu: custu diat a essi cumplicau ca custus trastus si funt fatus finis finis boghendi·ndi logu a is partis mecànicas chi iant a serbiri, ma at a essi comentisisiat prus fàcili a ddus aberri chena arriscai de ddus arrogai comenti acontessit oe. Sa chistioni est diferenti po is computer portàtilis, ca su logu est prus mannu e fait a ponni una bateria a incastru comenti si fadiat finas a pagus annus a oi.

Sa noa in is arretzas sotzialis e situs web italianus est stètia arricia cun reatzionis mistas: caliunu nd'est sètiu cuntentu, medas àterus ant cumentau cun ironia e àterus ancora no funt nudda cuntentus chi is telefoneddus no depant tenni s'acessu a sa bateria comenti fiat innantis, cun unu cobertori a incastru. Ma mancai no bidant totus su bantàgiu de custa polìtica, est beni a arregordai chi nosi chesciaus dònnia dii de sa becesa programmada de is dispositivus, chi custus non durant nudda e chi seus sèmpiri comporendi trastus nous mentris innantis sa cosa duràt annus e annus. Beni meda duncas chi si fatzat unu passu ainnantis concas a una tecnologia chi no siat fata po nci-dda fuliai sa dii apustis de dd'ai comporada - unu passu ainnantis curtzu, ma mellus de nudda.