Tiscali serrat Webspace

Si-dd'apu contau in s'artìculu dedicau a Neocities: su web de fini annus 1990 e primus annus 2000 fiat diferenti meda de su de oi e totus boliant giai unu contributu a dd'amanniai aberendi unu situ po fueddai de interessus e passionis. Po ddu permiti, is frunidoris de atzessu a Internet donànt a is abonaus unu pagu de logu po carrigai is pàginas insoru: su spàtziu web. Tiscali fiat tra custus e funt stètias medas is personis chi nd'ant aprofitau. Acuntessit ancora oi difatis de agatai situs web.tiscali.it fueddendi de dònnia argumentu in sa circa in Google e àterus motoris.

Totu custu at a spaciai tra pagus diis. Tiscali at difatis ghetau su bandu cun unu messàgiu chi cumparit in dònnia situ carrigau in su spàtziu suu chi su servìtziu at a essi serrau su 01/02/2026.

Est un'àteru sinnu chi is cosas funt cambiadas meda cun su tempus e sighit su caminu chi ant pigau àterus servìtzius comenti Fortunecity, Xoom.it, GeoCities e 000webhost. Oi su prus de su cuntènniu de Internet est fatu de messàgius curtzus, vìdeus e fotografias fatas cun su telefoneddu, sa comunicatzioni lesta e scarèscia pagus minutus apustis de dd'ai lìgia, is pregontas si faint a s'IA e is situs web parint cosa bècia, che is telèfonus pùblicus. Is pagus chi tenint ancora gana de scriri, difatis, s'afidant a sa fòrmula de su blog (o diàriu) cun programas comenti Wordpress chi permitint de publicai a sa lesta e chena connoscimentus tènnicus.

Po chini tenit ancora unu situ web, comentisisiat, ddoi est ancora tempus de passai a un'alternativa. Custas funt is prus realìsticas:

• Movi su situ a NeoCities;
• Impreai un'àteru servìtziu a in donu, comenti InfinityFree;
• Impreai Wordpress;
• Pagai unu servìtziu de hosting cumpletu, comenti Aruba o Keliweb o Tophost;

Seu seguru perou, a dolu mannu, chi medas de is situs acasagiagius in Tiscali siant oramai abandonaus, duncas tra dexi diis at a sparessi un'incueddu de su web chi forsis no at a torrai prus.