Una IA chi connoscit is coloris

Calincunu s'at a arregordai chi in su nùmeru 5 de sa revista de Ite Mi Contas apu publicau un'esempru de IA chi imparàt a fai sa summa de duus nùmerus. Nd'apu fueddau fintzas in custu artìculu. Impreendi sa pròpiu strutura po s'arretza neurali, apu preparau un'esempru de IA chi imparat a connosci is coloris e dd'apu fatu una bella interfaci, de manera chi totus dda potzant proai chena depi impreai cumandus scritus e cosas de aici.

Si podit proai innoi e ndi podeis scarrigai su còdixi de innoi.

Comenti podeis biri, s'interfaci est simpri meda: candu s'arretza finit s'annestru, podeis sceberai unu colori calisisiat e pediri a s'arretza de nai ita est. Fatu custu, podeis sceberai si at intzertau o no, e, si est sballiau, ponni bosàterus etotu su colori giustu. Su colori chi poneis agiudat s'arretza a sighi a imparai e a pagu a pagu s'iat depi fai sèmpiri prus pretzisa.

A s'incontràriu de sa suma, chi est un'operatzioni chi podit fai su protzessori de manera direta, custu est un'impreu bonu de s'IA ca su de connosci is coloris est unu protzessu chi non benit beni meda a fai cun unu càrculu matemàticu.

No apu a torrai a spricai comenti si fràigat e annestrat s'arretza neurali: po custu s'imbiu a custu artìculu e a sa revista, nùmerus 2 e 5.

Andendi a castiai su còdixi, bideus in /App/Controllers/ColorsController.js lìnia 42 chi sa prima cosa chi si fait, apustis de carrigai su documentu cun sa lìngua sceberada, est a creai s'arretza e incumentzai s'annestru. S'arretza tenei unu totali de 50 neuronis partzius in 3 po s'intrada (is cumponentis de colori RGB), 24 e 12 po is duus pìgius intermèdius chi serbint a afinai sa classificatzioni e 11 po sa bessida: unu po dònnia classi de colori (birdi, arrùbiu, grogu, asulu, etc). Cadaunu de is 11 neuronis de bessida in s'agabbu de su càrculu at a cuntenni sa probabilidadi chi su colori chi ddi currispondit siat su giustu. Po nai, su colori RGB = 236, 205, 153 (  unu clàssicu "colori de cani fuendi") iat podi essi grogu cun una probabilidadi de su 65,8% o marron cun probabilidadi de su 34,2%, sendi classificau a sa fini comenti a "grogu". Custu ca intra is 11 classis de colori no ddoi est unu "beige" e duncas tocat a dd'incasciai in su chi teneus.

S'annestru impreat una sèrie de datus giai prontus chi s'agatant /App/Datasets/ColorDataset.js pondendi-ddus in òrdini casuali, agiungendi variatzionis po tenni baloris in prus (data augmentation) e is datus de is sugerimentus de s'impitadori. In arretzas mannas s'annestru no si fait dònnia borta chi s'aviat su programa, ma innoi est còmodu po biri chi fintzas comenti ponimus in òrdini is esemprus po annestrai s'arretza e cantus bortas torraus a fai su protzessu (nùmeru de èpocas) fait sa diferèntzia in sa pretzisioni de is càrculus. Podeus biri difatis, in su registru a manu dereta de sa pàgina, chi sa percentuali de coloris intzertaus andat de su 53% a prus de su 70%, acostendi-sì a su 100% candu càrrigat is datus de is sugerimentus nostus.

Eus duncas torrau a biri su cuncetu de imparu automàticu: is pesus e is bias de s'arretza neurali s'arràngiant a pagu a pagu finas a candu a una sèrie de baloris in intrada no currispondit una certa sèrie de baloris in bessida: in custu esempru is baloris in intrada funt is nùmerus RGB e sa bessida funt is classis de colori. Po nai, unu colori RGB 255,0,0 depit essi amarolla assotziau a s'arrùbiu cun probabilidadi (agiumai) de su 100%. Dònnia borta chi cunsillaus unu colori nou, s'arretza arràngiat pagu pagu pesus e bias po adatai is arresuspostas benidoras. Si faeus custu unu nùmeru artu de bortas, s'arretza si fait prus pretzisa. Po chini bolit ponni manu a su còdixi, ddoi funt maneras po dd'ammellorai ancora chi apu cunsillau in su documentu readme.md chi agatais in Gitlab.