NeoCities: su web fatu a manu bivit ancora

Po cumprendi ita est NeoCities tocat a torrai una pariga de minutus a su web de is annus '90 e is primus 2000. Is giassus ddus scriiaus a manu in HTML o cun s'agiudu de un'editori visuali comenti Microsoft FrontPage o Namo WebEditor. No ddoi fiant is arretzas sotzialis: a su sòlitu si comunicàt cun is àterus impitadoris po mèdiu de chat o forum, chi is prus pagu espertus podiant agiungi a su situ gràtzias a ainas de servìtzius esternus. Is giassus fiant stàticus: nudda de cumentus, nudda de votus, perunu repicu a foras de is GIF animadas; fiant fatus pro spainai connoscimentu, no pro spassiai (sceti).

In generali, su de si fai su giassu web fiat unu grandu obietivu: totus ndi boliant unu po fueddai de is interessus pròpius. Is cumpangias telefònicas difatis oferiant sèmpiri cun s'abonamentu fintzas su spàtziu web de impreai a custu scopu. Custu est andau ainnantis finas a sa difusione de is diàrius (blog) innantis e de is arretzas sotzialis apustis.

Oi su web est in declinu, fatu sceti de post efìmerus e cosas a comporai.
Ddoi at unu bisòngiu mannu de torrai a ponni connoscimentus a disponimentu po fraigai cudda biblioteca mundiali manna chi oi est morendi-si. Custa est sa punna de NeoCities.

Neocities est una prataforma de hosting a in donu po giassus web stàticus chi cunsentit a is impitadoris de creai e publicai càbidus online impreendi HTML, CSS e JavaScript. No faint bisòngiu cumpetèntzias mannas de programatzioni, de manera chi fintzas is printzipiantis potzant creai unu situ web. S'interfaci includit un'editori HTML integrau in su navigadori, unu sistema de gestioni simpri de documentus, agiudu po dòminus personalitzaus, feed RSS e trastus a riga de cumandu. No acasàgiat publitzidadi e promovit s'autonomia creativa prena, oferendi unu logu chena vìnculus cummertzialis po sa publicatzioni de progetus personalis, portfolio, blog o esperimentus gràficus.

Su design e sa filosofia de Neocities amentant in manera crara s'era de is giassus personalis de is primus annus 2000, comenti is chi si publicànt in GeoCities, prataforma famada annus a oi ma oramai defunta. Is piessìnnius suus funt is layout simpris, sa gràfica personalitzada e s'ènfasi in s'espressioni individuali. Custu acostamentu sotziali, unidu a sa libertadi totali creativa, contribuit a torrari a strantaxai un'ecosistema web decentralizau e partecipativu, in cuntrastu cun is dinàmicas de is prataformas centralizadas modernas, cun moderatzioni e censura fortis meda.

Po cumintzai cun Neocities bastat a si registrai a in donu in su situ ufitziali. Una borta creau su profilu, intraus in una dashboard chi amostat is noas de is situs chi sigheus e oferit unu butoni po modificai su spàtziu nostu. S'editori integrau cunsentit de carrigai documentus, scriri còdixi HTML deretu in su navigadori e organizai sa strutura de su giassu comenti a una cartella stàtica. No serbint cumpetèntzias mannas: fintzas chini est imparendi podit incumintzai copiendi e modifichendi template chi esistint, sighendi ghias pensadas po printzipiantis, o impreendi un'editori visuale esternu (comenti BlueGriffon, su Composer de Mozilla SeaMonkey, Amaya, WYSIWYG HTML Editor e medas àterus) e carrigai apustis is documentus in NeoCities.

Is chi tenint esigèntzias prus mannas podint agiungi cumponentis esternus comenti contadoris de bìsitas, chat, forum, guestbook e àteru impreendi servìtzius comenti Bravenet, WebsiteOut, Counter12, CBox, 123guestbook e medas àterus. Est fintzas possìbili a amanniai unu forum in servìtzius comenti FreeForumZone o ForumFree e ndi ponni s'acàpiu in su giassu. No si depeis abetai una truma manna de iscritus comente in is primus annus 2000, ma abarrei certus chi chitzi o tardu calincunu at a fai bìsita po postai pregontas e impressionis e mancari s'at a creai fintzas una comunidadedda unida. Po ddus mantenni bius e no giai un'idea de abbandonu, iais a podi aberri carchi arraxonu bosàterus matessi candu no candu.
Cunsillu infinis de creai un'indiritzu curtzu po su giassu impreendi unu servìtziu de rediretzioni a in donu comenti dot.tk.

Neocities favoressit s'interatzioni sotziali a traessu de profilus pùblicus, feed de noas, tag temàticos e sa possibilidadi de sighi àterus creadoris. Cada giassu podit essi esplorau, cummentau e cumpartziu, agiundendi sa nàscida de micro-comunidadis a ingiru de interessus comunus. Esistint fintzas logus esternus comenti subreddit, forum e blog dedicaus, innui is impitadoris si scàmbiant cunsillus, layout e trastus.

Concruendi, NeoCities est una comunidadi cun unu gustu retrò innui eis a podi torrai a scoberri su web beru, siat comenti a spetadoris siat comenti a protagonistas e cumpartziri is connoscimentus bostus, a manera bosta, chena postadas chi siant scarèscias apustis de 10 minutus, chena sa censura de Meta, ma sèmpiri de manera fàcili, intuitiva, e comenti a parti de una comunidadi, si boleis.

Faei·mi sciri si decideis de nci proai e/o chi si fait bisòngiu unu pagu de agiudu.