ChatGPT e Alexa funt in crisi

Custas diis seus ligendi noas medas chi contant sa crisi innui si funt agatendi custus duus prodotus famaus: Alexa, s'assistenti vocali de Amazon, e ChatGPT, su chatbot de OpenAI chi at fatu arraxonai e orriolai meda in s'ùrtimu annu.

Alexa est un'aina chi est lòmpia a 10 annus de vida. Est una de is chi ant portau a primu s'intelligèntzia artifitziali a is domus nostas. Bona a connosci is cumandus de boxi, permitit de circai informatzionis in su web, ponni mùsica, ativai pro-memòria e svèllias e a cumandai dispositivus de domòtica cumpatìbilis (luxis, ària cunditzionada, eletrodomèsticus, etc). Fait fintzas a nd'amanniai sa funtzionalidadi agiungendi aplicatzionis comenti acostumaus cun is telefoneddus.
Mancai Alexa siat intrada in domus medas, bessendi fintzas unu sceberu fitianu po arregalus de festas de Paschixedda (in dispositivus comenti Amazon Echo), sa divisioni sua in Amazon est in pèrdida manna, cun 25 milliardus de deficit. Parit chi custa situatzioni siat nexi de sa strategia de bendi is dispositivus Echo a pagu prètziu po podi guadangiai prus tradu a traessu de s'impreu de Alexa, ma is cosas no funt andadas beni.
Ligendi is cumentus me is arretzas sotzialis, in prus, parit chi is impitadoris no siant prus cuntentus de su connoscimentu de is cumandus e su chi custus dispositivus oferint, comenti chi si tratessit de una tecnologia oramai bècia.
Amazon at decìdiu de annoai s'IA de Alexa cun mòllius nous, chi ant a permiti unu mellus arraxonu cun su dispositivu e de portai cumandus prus cumplessus a cumprimentu. Custas funtzionis noas ant a essi a disponimentu paghendi un'abonamentu de unus 10 dòllarus a su mesi. Difìcili a nai si custa strategia at a funtzionai. Tocat a nai chi ddoi funt fintzas orriolus in contu de sa privatesa, sendi chi custus trastus tenint unu micròfonu sèmpiri abertu, unu scenàriu chi calincunu cunsiderat Orwellianu. A proa chi custu orriolu no est tontu, tocat a cunsiderai chi una borta sa Giustìtzia at impreau is datus de Alexa po circai is proas de unu bocidroxu, ca su dispositivu teniat s'arregistratzioni de totu su chi fiat acuntèssiu in un'aposentu privau, e chi àteras bortas Amazon at impreau fintzas umanus po ascurtai is arregistratzionis.

Po cantu pertocat ChatGPT, si-ndi fueddat dònnia dii in custu perìodu, a bortas tratendi-dda che unu Deus ex Machina chi at a arrangiai totu is problemas de su mundu e a bortas che unu dimòniu chi si-nd'at a furai totu su traballu, lassendi s'umanidadi a su fàmini. Connoscendi mellus su trastu, sa realidadi parit meda prus nojosa de aici. ChatGPT est unu trastu chi, a traessu de s'imparu automàticu, podit generai testus chi asimbillant a cosa scrita de umanu. Agiumai totu is motoris de circa in dii de oi oferint sa possibilidadi de arraxonai cun chatbot che custu po circai informatzionis a sa lesta o generai testus po lìteras, blog, etc. Est craru chi unu trastu che custu tenit sa potentzialidadi de essi impreau comenti a assistenti a fainas umanas de dònnia tipu, ma cantu a sa possibilidadi de pigai su logu a is umanus etotu, abarrant dudas medas, sendi chi s'arresurtau est bortas medas impretzisu, limitau e fintzas sballiau e dannàrgiu.
Est possìbili chi, a pustis de una fasi de entusiasmu mannu, is impitadoris siant giai perdendi s'interessu po ChatGPT e po is chatbot in generali o fintzas chi sa cuncurrèntzia manna chi ddoi est in custu setori siat limitendi is guadàngius de OpenAI chi est in una situatzioni de pèrdida chi dda ponit in perìgulu de fallimentu. De seguru, càncua cosa de ponni in contu est s'impreu de energia chi s'IA bolit, unu costu mannu po is frunidoris (e fintzas po su praneta nostu). Si càrculat difatis chi ChatGTP tra pagu at a bolli s'energia de una natzioni intrea.
No scieus cali strategias at a proai OpenAI po si sarvai de su fallimentu. Un'arrespusta iat a podi benni de una versioni lèbia de ChatGPT, GPT-4o, chi at a agiudai a amanniai su nùmeru de impitadoris.

Fontis:

Etichette

Intelligèntzia artifitziali

Assistenti vocali

OpenAI

ChatGPT

Amazon

Amazon Echo

Cumenta

Categorias

Eletrònica