S'acontèssida de su colletivu Autistici/Inventati

Fàtzile chi in antis de oe pagos nd'apant intèndidu chistionare, ma su colletivu de hacker Autistici/Inventati (A/I) est nàschidu in su 2001 pro difèndere sa libertade de faeddu, sa privatesa e gherrare contras sa tzensura in lìnia, frunende servìtzios comente posta eletrònica, ispàtziu web e àteros servìtzios a ativistas, movimentos e colletivos chi nde cumpartzant is balores. Issos etotu si definint anti-fascistas, anti-militaristas, anti-sessistas, contràrios a sa globalizatzione e a is ispeculatziones finantziàrias.
Pagas dies a immoe, su guvernu USA at detzìdidu de classificare A/I comente a grupu terrorista, blochende·nde sa faina in lìnia, lassende·ddu chene contu bancàriu e lassende fintzas chene servìtziu chie totu teniat su situ web in sa retza issoro. Si tratat de una medida grae meda chi, in prus de fàghere dannu a unu grupu chi non tenet nudda de fàghere cun su terrorismu, depet fàghere pensare a comente est fàtzile a s'agatare a foras de sa retza, chi oe serbit pro totu, e chene dinari, pro neghe de una detzisione de is Istados Unidos.

Su grupu difatis tenet totu s'istrutura sua in Itàlia e impreat is servìtzios de sa Banca Etica (chi at giai espressadu solidariedade), ma fintzas de aici, pro un'atu de tzensura de su guvernu istadunidensu s'est agatadu dae una die a s'àtera de su totu blocadu, isceti pro una chistione ideològica.
Su guvernu italianu est lassende fàghere, comente podìamus immaginare in un'istadu serbu de s'Amèrica che s'Itàlia, duncas est fàtzile puru a crèere chi custa cosa at a torrare a acontèssere e s'at a furriare a arma de ameletzu pro ònnia òrganu e grupu chi is USA no ant a agradèssere, siant de manca o de dereta. Lassende·ddus fàghere ddis donamus su permissu, a incumentzare dae immoe, de aplicare una tzensura a totu is cuntènnidos de sa retza. Est su momentu duncas de cundennare custu episòdiu e de pedire a boghe manna chi Internet siat unu logu lìberu.

E forsis si depimus domandare fintzas si digitalizare totu est un'idea bona. Sa die chi totu at a èssere in Internet, amus a lassare su cuntrollu de su dinari nostru, de is canales de informatzione, tv, ràdiu, giornales e fanzine, libros e totu su restu a s'Amèrica?

Mentras nche pensades, bos lasso unu ligòngiu a sa lìtera aberta de su grupu.