Mozilla preparat un'arraxonu cun Sardware

Mozilla at annuntziau un'atòbiu cun is tradutoris sardus, chi s'at a fai su 28 de friaxu a is 18:00 (oràriu de Sardìnnia). S'at a arraxonai de argumentus vàrius, comenti s'importu de furriai unu programa in prus lìnguas e su raportu intra diversidadi e programas a còdixi abertu.

A pigai parti ddoi at a essi una rapresentàntzia de Sardware, grupu de boluntàrius ativu in sa tradutzioni de unus cantu programas e ainas informàticas comenti a Firefox, DuckDuckGo, Mastodon, VLC, Telegram e àteru.

Est un'ocasioni po unu progetu in lìngua sarda po si cunfrontai e fai connosci sa realidadi nosta a livellu internatzionali, una realidadi chi Sardware arrapresentat beni, sendi chi s'amparu e sa spainadura de sa lìngua sarda a dii de oi est in manu a boluntàrius, mentris is ùrtimus guvernus de sa Regioni ant giau unu cuntributu limitau meda.

Chini totu est interessau, podit fai pregontas scriendi-ddas a custu indiritzu o in direta.

At a fai a sighi s'arraxonu in direta o arregistrau innoi.