Instagram faghet dannu a is giovaneddas?

Is retzes sotziales ant cambiadu meda s'impreu de is tecnologias me is ùrtimos 10-15 annos, cun maneras noas de bìvere is raportos cun is àteras persones.
No faghet a nàrrere chi custu càmbiu siat de s'in totu negativu: is sotziedades càmbiant e tocat a èssere prontos a atzetare chi carchi cosa funtzionet a manera diferente cun su passare de su tempus. A bortas, però, tocat a èssere puru prontos a ammìtere chi una tecnologia est faghende prus dannu chi no profetu e custa podet èssere sa situatzione de Instagram, si una chirca interna at a èssere cunfirmada.

No amegamus de chistionare, difatis, de su sòlitu allarmismu de is mannos cara a su chi praghet oe in die a is pitzocheddos: comente at contadu su Wall Street Journal, una chirca interna a sa sotziedade de Facebook at ammustradu chi s'impreu de Instagram faghet un'efetu tòssicu a is pitzocheddos e, prus che totu, a is pitzocheddas.

Po cantu est essidu a foras de custa chirca, su 32% (de tres, una) de is giovaneddas ant naradu chi cando s'intendiant male pro su corpus issoro, Instagram ddas faghiat intèndere peus, cun reatziones chi ant inclùdidu depressione e pensamentos de suitzìdiu.

Sa resone est fàtzile de cumprèndere: Instagram permitit de publicare fotografias e medas de custas ammustrant corpus perfetos e vidas ideales. Mancari custas potzant èssere isceti fàulas de ammustrare a is sighidores, creant a is ogros de is pitzocheddos (e no isceti a issos) unu standard de bellesa e richesa, cun s'efetu chi medas de issos podent pensare de no èssere bastante bellos o de no tènnere bastante cosas in sa vida pro èssere apretziados.
Si agiungemus chi is retzes sotziales podent èssere tòssicas in sese, creende dipendèntzia, craru est chi s'efetu podet isceti peorare.

Facebook, a sa pedida de su senadu de is Istados Unidos de publicare totu sa chirca, si nche sunt essidos costa-costa, cumportamentu chi unu de is senadores at paragonadu a su de is cumpangias de tabacu chi cuaiant is chircas sientìficas mentres bendiant produtos dannosos a is pitzocheddos. In s'ìnteri, cun un'artìculu in su blog issoro ant decraradu chi su chi at publicadu su Wall Street Journal est isceti una parte de sa chirca chi ammustrat su traballu issoro pro fàghere sa retze segura pro is prus giòvanos.

Calicunu esperimentu pro agatare una solutzione Facebook dd'at fatu, comente proare a cuare su nùmeru de "Mi praghet" in Instagram, ma custu no at cambiadu nudda e paret chi siat istudiende una versione pro pipios de sa prataforma, idea chi at giai retzidu unas cantas crìticas.