A pustis de s'antitrust americanu, puru s'anti-monopòliu italianu ipotizat un'abusu de sa positzione de domìniu de Google. Su problema custa borta est s'impreu de is datos pro s'elaboratzione de sa publitzidade.
Google est istada acusada de impedumare a is aziendas concurrentes de pònnere elementos de sighidura de sa navigatzione in su web de is usuàrios pro èssere s'ùnica a pòdere regollere custos datos.
Bos bògio sinnalare un'idea de interessu pro favorèssere sa localizadura de totu is programmas e, prus che totu, donare sa possibilidade a is regiones linguìsticas de minoria de tènnere programmas furriados in sa limba issoro.
Semus chistionende de su Manifestu pro una tecnologia linguìstica aberta, chi totus podimus firmare in su giassu web suo.
Google est istada acusada dae su guvernu de is Istados Unidos e s'Antitrust de pràticas anti-concurrèntzia pro tènnere sa positzione sua de monopòliu.
Segundu Il Sole 24 Ore, s'acusa est de àere pagadu aziendas tecnològicas pro mantènnere Google comente motore de chirca predefinidu. In custa manera, sa parte manna de is chircas sighit a èssere fata a traessu de cussu permitende-ddi de gadangiare semper de prus.
Su Lenovo ThinkPad X1 Fold est su primu portàtile cun ischermu mugiaditu. Essidu a pustis de duos annos de traballu, est un'elaboradore de 13,3" cun protzessore Intel Lakefield, 8GB de RAM e 1TB de discu fissu. Est cumpatìbile cun s'istandard 5G e impreat Windows 10 comente sistema.
Segundu un'artìculu de WhatsApp Beta Info, s'aplicatzione de messàgios prus famada de su mundu est acanta a donare sa possibilidade de èssere impreada cun fintzas a 4 dispositivos a su pròpiu tempus sena dèpere lassare su dispositivu primàriu acapiadu a Internet. In prus, ant a arribare is messàgios, fotografias e àteros mèdias chi s'ant a cantzellare a solos a pustis chi s'arritzidore ddos at castiados.
Apple at presentadu unos cantos produtos noos. Ocannu, pro neghe de s'emergèntzia Covid, sa presentada est istada fata cun un'eventu virtuale. Semper pro su pròpiu motivu, s'isvilupu de s'iPhone nou est trighende e at a èssere presentadu prus tardu. Castiamus in curtzu cale sunt is noas.
Bos ddu regordades Napster? Fiat famadu meda intre su 1999 e su 2001 comente servìtziu pro iscarrigare mùsica in formadu MP3 e est isparèssidu a pustis chi su grupu de is Metallica dd'at fatu càusa e unu giuge dd'at obligadu a serrare e a pagare su dannu.
Sa versione noa de Android est essida a prus de un'annu dae sa de deghe e is dispositivos cumpatìbiles dda sunt giai iscarrighende pro s'annoare. Aia giai chistionadu de unas cantas noas de custu sistema in un'artìculu de su martzu passadu. Andamus a bìere immoe una pariga de càmbios de importu pro s'esperièntzia de impreu.
Oe est sa die de is programmadores. Sa festa est connota a manera ufitziale in Rùssia isceti, in ue, rispondende a una regorta de firmas, su guvernu at detzìdidu de dedicare custa festa a is programmadores pro s'importu issoro a s'isvilupu de sa sotziedade. Sende chi is programmadores sunt una comunidade internatzionale, no est cosa istròlica a si fàghere is augùrios, mancari no siat die de festa ufitziale a foras de sa Rùssia.
