Google Play Mùsica est una de cussas aplicatziones chi medas de nois no impreant ma chi no faghet a bogare dae su telefoneddu, ca sunt cunsideradas "aplicatziones de sistema". Serbit a comporare mùsica, a sa pròpiu manera de iTunes e Amazon Music e permitit fintzas de dd'ascurtare comente in Spotify. Comente si siat, Google at detzìdidu de dda serrare a fine de ocannu. Is funtziones suas ant a èssere postas a disponimentu dae YouTube Music, in ue is impitadores podent portare sa mùsica chi ant giai comporadu, pro no dda pèrdere.

Cun unu messàgiu curtzu, Toshiba at decraradu in su giassu suo chi at lassadu sa cuota sua de Dynabook a sa Sharp. Dynabook est su nòmine nou de Toshiba Client Solutions Co., Ltd a pustis chi Sharp nd'at comporadu sa parte manna. In custa manera, Toshiba est essida a foras de su setore de is elaboradores personales.

Microsoft est chirchende de comporare TikTok, sa retza sotziale famada meda intre is prus giòvanos. Sa tentada de cobru si ponet in su cuntestu de s'ascu internatzionale intre is Istados Unidos de Amèrica e sa Tzina. Difatis, su presidente Donald Trump at decraradu chi TikTok at a dèpere serrare in is USA si sa propiedade no colat a un'azienda americana.

Cortana, s'assistente vocale de Microsoft est arribbada in su 2014 in pari cun Windows Phone 8.1 ma, comente su sistema Microsoft pro telefoneddos, no est renèssidu a intrare in su coro de is impreadores e duncas Microsoft at detzìdidu de dda bogare dae is dispositivos iOS e Android a incumentzare dae su 2021. Dd'at annuntziadu sa Microsoft etotu in un'artìculu in su giassu suo.

Google at publicadu sa versione 84 de su navigadore suo, Chrome. Sa publicatzione est arribada tardu, comente pro totu is versiones a incumentzare dae sa 81, pro more de su traballu chi est andende prus a bellu in custu tempus de pandèmia. Is noas, in pari cun sa curretzione normale de faddinas, tocant sa seguresa e s'agiunta de funtziones noas.

No fiat difìtzile de bisare chi Facebook boleret aunire a unu tzertu puntu totu is aplicatziones de messàgios suas in una isceti o a su mancu de fàghere a manera chi siat prus fàtzile a comunicare cun is impreadores de s'una o de s'àtera e dd'aiat fintas cunfirmadu Zuckerberg s'annu passadu. Unu programmadore at iscritu un'artìculu a pitzus de s'incumentzu de sa possibilidade de unire Messenger cun Instagram, mancari siat ancora isceti una proa tècnica chi podet èssere tirada in is meses chi benint.

Sa regorta de firmas pro su domìniu .srd est inghitzada giai dae diora meda e sighit cun s'agiudu de is sardos e de is amantiosos de sa Sardigna chi nche creent.
Su domìniu de primu livellu, ddu regordamus, est sa parte a pustis de s'ùrtimu puntu in s'indiritzu de unu situ. Bide sa letzione a pitzus de su Web pro prus informatziones.

Sunt isceti 4 milliones is iscarrigamentos de s'app Immuni, su programma pro telefoneddos chi depiat agiudare a firmare s'isparghidura de s'impestu de COVID-19. Est unu nùmeru meda prus bàsciu de su 60% de sa populatzione chi fiat sa pertzentuale de segudare pro pòdere funtzionare bene. S'iscarrigamentu no est obligatòriu e in nisciunu casu ddu podet èssere pro more de sa costitutzione italiana e de is leges in contu de privatesa, ma su guvernu italianu isperat de cumbìnchere prus gente cun una publitzidade prus manna in is dies chi benint.

Adobe nos informat chi su 31 de Idas 2020 at a acabbare de annoare e cumpartire su Flash Player, programma chi est istadu pro medas annos sa base de medas giassis Web, incluidu Youtube, ma chi a incumentzare de su 2015 at inghitzadu a èssere mudadu cun solutziones HTML5, prus lèbias, prus seguras e prus adatas a funtzionare in telefoneddos e àteros dispositivos mòbiles.

Una de is noas de importu prus mannu in sa cunferèntzia de is isvilupadores de Apple de ocannu est sa detzisione de lassare is protzessores Intel a pustis de 15 annos pro impreare is protzessores issoro, is Apple Silicon.